Избранной Богом от младенческих пелен /и даром прозорливости, чудотворения и исцеления благодатию Духа Святого одаренной/, блаженной старице Матроне, нетленным венцем от Господа на Небеси увенчанной ,/ соплетем и мы, православние, на земли венец похвальный из песен духовных/, ты же, блаженная мати/, приими от наших сердец благодарных/ и яко имущая дерзновение пред Господом,/ от всяких нас бед, скорбей, болезней и козней вражиих избави,/ да с любовию поем ти:
Радуйся, блаженная старице Матроно, предивная чудотворице.
ИКОС 1
Ангелом во плоти в рождестве твоем явилася еси на земли; аще и без телесных очес узрелася еси от всех, но Господь, умудряяй слепцы и праведных любяй, просвети духовная очеса твоя, да явишися предвидящая будущая, яко настоящая, и от всяких многообразных болезней страждущих исцеляющая. Мы же за сие зовет ти мати, таковая:
Радуйся, от младенчества Богом избранная.
Радуйся,благодатию Духа Святаго от пелен осиянная.
Радуйся, дарованием чудотворения от млада наделенная.
Радуйся, премудростию от Бога свыше одаренная.
Радуйся, телесных очес лишенная, очесами душевными просвещенная.
Радуйся паче зрячих и мудрецов века сего Богом умудренная.
Радуйся, блаженная старице Матроно, предивная чудотворице.
КОНДАК 2
Видяще иерей и людие предстоящии при крещении Твоем исшедшый из Святыя купели столп аки пара и обоняше благоухание велие в храмине при сем, познавше тя праведницу, дарованную от Бога на землю, прославили Бога, творящего дивная и преславная в людех своих, ангельскою песнею:
Аллилуия
ИКОС 2
Разум имея свыше просвещенный, крестивый тя иерей Божий позна, яко чадо крещаемое от него, есть сосуд Божия благодати и тя младенцем Святым нарече. От нашего же усердия приносим ти похвалы сия:
Радуйся, чадо Богом дарованное.
Радуйся, от Святой купели благодатию Святого Духа облагоуханная.
Радуйся, крестившим тя священнослужителем Божиим от рождения твоего
Святою нареченная.
Радуйся, крестом святым на теле своем Богом запечатленная.
Радуйся, даром чудотворения от Бога прославленная на земли.
Радуйся, венцем неувядаемым от Господа увенчанная на небеси.
Радуйся, блаженная старице Матроно, предивная чудотворице.
КОНДАК 3
Силою Вышняго в младенчестве святая со одра своего к иконам святым переношашеся, радующися, яко со други своими, лепетом уст своих славящи Бога, навыкшего "из уст младенец совершати хвалу Себе", чистым сердцем поющи Ему:
Аллилуия.
ИКОС 3
Имуще от Бога дар прозорливости, от рождения лишенная телесных очес, духовными открытыми очесами предрекала еси людем будущия, яко настоящее, терпящи за сие насмешки и поругания от родных и близких, слышащих си; от верных же приими сицевая:
Радуйся, предивная прозорливице.
Радуйся, невидимых и далече сущих неложная предсказательнице.
Радуйся, пророческим дарованием от Бога наделенная.
Радуйся, даром сим многия утешавшая.
Радуйся, за исцеление болящих нечесого же от них взимающая.
Радуйся, насмешки и укорение за сие без ропота терпевшая.
Радуйся, блаженная старице Матроно, предивная чудотворице.
КОНДАК 4
Буря недоумения и смятения обыде мя, како возмогу возхвалити и прославити житие святыя праведницы, аще не Господь, дивный во святых своих, молитвами блаженной старицы вразумит мя, да воспою Ему за сие хвалебную песнь:
Аллилуия.
ИКОС 4
Слышавше людие от тебе, мати Матроно, предсказания о имеющих с ними в житии быти, стекахуся к тебе с недоуменьми, скорбьми и печальми своими и, утешение и совет благоразумен приимше, благодарим тя, зовуще:
Радуйся, заблуждений и недоумений наших добрая вразумительнице.
Радуйся, печалей наших утолительнице.
Радуйся, скорбей наших утешительнице.
Радуйся, благочестия учительнице.
Радуйся, благая безсеребренице.
Радуйся, недугов всяческих прогонительнице.
Радуйся, блаженная старице Матроно, предивная чудотворице.
КОНДАК 5
Боготечная звезда явилася еси, Мати блаженная Матроно, в стольном граде Москве, яко странница не имущая зде пребывающего града, с место на место иное преселялася еси, приносящи недоумевающим вразумление, страждущим ослабу, больным исцеление, да благодарственно зовут Богу:
Аллилуия.
ИКОС 5
Видевше обильную реку чудес и исцелений, от тебе истекающую Божиею благодатию: хромым хождение, разслабленным и на одре лежащим - исцеление, от бесноватых - духов злобы прогнание, устремишася к тебе, мати, яко к источнику чудес неисчерпаемому, страждущии и болящии и напоишася обильно; утешеннии и исцеленнии, умиленным сердцем возопиша тебе:
Радуйся, праведница, от Бога нам ниспосланная.
Радуйся, целительнице, вся недуги наша исцеляющая.
Радуйся, душеполезными советами нам помогающая.
Радуйся, вся наша сомнения и недоумения скоро разрешающая.
Радуйся, бесов от человек страждующих изгоняющая.
Радуйся, на путь правый, к Богу ведущий нас наставляющая.
Радуйся, блаженная старице Матроно, предивная чудотворице.
КОНДАК 6
Проповедником святости и праведности жития твоего, блаженная, явися святый отец Иоанн Кронштадский, повелевая верующим людем в храме разступитися и пропустити к нему юную отроковицу Матрону, именуя ю смену свою и осьмый столп России. И прославиша Господа слышавшии о сем, возглашающе Ему небесную песнь:
Аллилуия.
КОНДАК 6
Возсияваше в сердцах неведущих Бога и грехи многими прогневляющих Его, молитвами твоими, свет благодати Божия, и, видяще чудеса, тобою совершаемае, обращахуся ко Господу, ублажающе блаженную старицу сими славословии:
Радуйся, чудесы твоими Бога прославляющая.
Радуйся, величие Бога и славу Его в них нам открывающая.
Радуйся, души неверующих к Богу обращающая.
Радуйся, сердца неверием помрачненныя светом Божиим просвещающая.
Радуйся, покаянию и заповедем Божиим нас научающая.
Радуйся, прославляти и благодарити за все Господа нас вразумляющая.
Радуйся, блаженная старице Матроно, предивная чудотворице.
КОНДАК 7
Хотя спасти творение Свое в последния сия времена, егда вся сила вражия, за отступление от Бога и нераскаянность во многочисленных гресех, воста на творение Божие, посылает милосердный Господь в грешный мир угодников Своих, таковая бо подвижница и молитвенница и явися еси блаженная старице Матроно. Прославим же за милосердие Божие к нам, грешным, благодарно поюще Ему:
Аллилуия.
ИКОС 7
Новую и дивную дарова Господь людем российским заступницу, молитвенницу, целительницу и ходатаицу за них к Богу по отшедших от мира сего отцех Оптиной пустыни, святых Льве, Макарии и Амвросии, и святем Иоанне Кронштадтстем, подвизая угоднице Своей, блаженной старице Матроне воспевати сице:
Радуйся, спасения нашего к Богу ходатаице.
Радуйся, о прощении грехов наших Судии праведного умилостивительнице.
Радуйся, святых храмов и монастырей усердная посетительнице.
Радуйся, безпомощных и безнадежных больных и обидимых ниспосланная
Богом покровительнице.
Радуйся, с силами бесовскими и козньми их непрестанная воительнице.
Радуйся, безкровная мученица Христова, над злейшим мучителем - диаволом победительнице.
Радуйся, блаженная старице Матроно, предивная чудотворице.
КОНДАК 8
Cтранное чудо бысть неверующим и неразумным, како слепая может видети и знати не точию настоящая, но и будущая, не ведяху бо силы Божия в немощи человечестей совершаемыя, ни еже пети Богу:
Аллилуия.
ИКОС 8
Вся бывши святая в Бозе, аще телом и в мире сем грешном многими верными и неверными, благочестивыми и нечестивыми бяше всегда окружаема, никогоже без участия и утешения не отрину от себя, терпящи от многих досаждения и обиды, гонения, скорби и укорения, не сетующи о сем, но за вся благодарящи Бога, понуждающи нас терпеливо нести крест свой. Мы же приносим ей благохваления таковая:
Радуйся, многия скорби и болезни за исцеление недужных претерпевшая.
Радуйся, в борьбе с духи нечистыми все житие свое проводившая.
Радуйся, от злых людей за сие хождения лишившаяся.
Радуйся, в молитве усердной непрестанно пребывавшая.
Радуйся, на кулачке склонившися, седящи почивавшая.
Радуйся, бодрствующи духом, вся нощи в молитве проводившая.
Радуйся, блаженная старице Матроно, предивная чудотворице.
КОНДАК 9
Всякия скорби и болезни претерпела еси мати Матроно, непрестанно борющися с силами тьмы, изгоняющи их от одержимых нечистыми духи, изобличающи козни и коварства их, и никогдаже не пороптала еси, до самыя смерти помогающи страждующим, болящим и скорбящим, выну поющи Господу Богу, укрепляющему тя силою Своею:
Аллилуия.
ИКОС 9
Витии многовещаннии не возмогут достодолжно постигнути данных Богом тебе свыше даров благодати Духа Святаго и описати и прославити всю святость жития твоего и чудеса, силою Божиею тобою совершаемая. Тем паче наше малоумие како может постигнути судьбы Божия, на тебе совершаемыя и грешными усты нашими како воспоем и прославим тя, блаженная мати? Но хотя по слову псалмопевца "хвалити Бога во святых Его", подвизаеми сердечною любовию к тебе, дерзаем на сие похваление и зовем ти:
Радуйся, нищая духом, яко таковых есть Царствие Небесное.
Радуйся, узким и тернистым путем шествовавшая.
Радуйся, яко птица небесная с места на место перелетавшая.
Радуйся, аще и птицы небесные гнезда имут, ты же ни храмины, ни сокровищ себе на земле не стяжавшая.
Радуйся, яко Сыну Божию, не имевшему где главу подклонити, уподобиласи еси на земли.
Радуйся, яко с Ним ныне в обителях райских вселилася на небеси.
Радуйся, блаженная старице Матроно, предивная чудотворице.
КОНДАК 10
Cпасти хотящи многия люди от страданий телесных и душевных недуг, вся нощи проводила еси, праведнице Божия, в молитве коленнопреклоненно, просящи помощи и укрепления у Господа нашего Иисуса Христа, в земнем странствии Своем преклонявшаго колена в молитве пред Отцем Небесным, поюще со ангелы Ему:
Аллилуия.
ИКОС 10
Стена и покров была еси при жизни, блаженная мати, всем к тебе в нуждах и скорбех прибегающим, но и по смерти не престала еси ходатайствовати пред Богом о людех, с верою приходящих к тебе. Услыши, благая мати, ныне и нас, многогрешных скорбьми, болезньми и многими печальми одержимых, и потщися на помощь к нам святыми своими молитвами, умилостивляющи благоутробнаго Господа о всех, к тебе вопиющих:
Радуйся, теплая за нас Богу молитвеннице.
Радуйся, усердная о нас, грешных, к Богу предстательнице.
Радуйся, болезни и скорби терпети благодарно нас вразумляющая.
Радуйся, мысли благия в недоумениях наших на сердце нам полагающая.
Радуйся, молитвою твоею спастися нам помогающая.
Радуйся, далече телом от тебе сущих, но от души усердно тебе призывающих не оставляющая.
Радуйся, блаженная старице Матроно, предивная чудотворице.
КОНДАК 11
Пение неземное, ангельское слышиши ныне, мати честная Матроно, еще на земли живущи сподобившаяся, невидимо окружающим, беседовати со ангелы небесными. научи и нас, недостойных, како подобает славити Бога, в Троице почитаемого: Отца и Сына и Святаго Духа, Ему же непрестанно на небеси воинства небесная велегласно поют:
Аллилуия.
ИКОС 11
Светозарным светом сияет житие твое, блаженная старице Матроно, освещающе мрак многосуетного мира сего, и влечет к себе души наша, да озарятся и они хотя малою лучею благодати Божией, и возмогут пройти богоугодно скорбный и тесный жизненный путь, и достигнути врат Царствия Божия, идеже ты, мати, ныне, веруем, вселилася еси, услыши глас тебе зовущих:
Радуйся, светильниче Божий, нас и по смерти просвещающий.
Радуйся, бисере честный,блистанием святыни твоея нас озаряяй.
Радуйся, светом дел твоих добрых в православии нас укрепляющая.
Радуйся, цвете благовонный Духом Святым души наша облагоухаяй.
Радуйся, все житие твое свято и праведно.
Радуйся, и смерть твоя пред Богом честная.
Радуйся, блаженная старице Матроно, предивная чудотворице.
КОНДАК 12
Благодать Божию обильно еще от пелен восприяла еси, мати блаженная, сия же выну пребысть с тобою по вся дни: недуги исцеляла еси, бесов изгоняла еси, невидимое и далече сущая предсказующи и на спасение всех наставляющи. Веруем несомненно, яко по смерти благодать сия наипаче пребывает с тобою, сего ради припадающе молимся: не лиши и нас, еще странствующих на земли, помощи твоея и заступления, просящи Господа помиловати и спасти всех, усердно Ему возносящих во святых храмех наших торжественное пение:
Аллилуия.
ИКОС 12
Поюще чудеса твоя, мати Матроно, восхваляем Бога, даровавшего тебе благодать таковую и с пророком Давидом псаломски вопием, правым бо подобает похвала:
Радуйся, яко "Господь любит праведники".
Радуйся, яко "Господь умудряет слепцы".
Радуйся, яко "хранит Господь вся любящия Его".
Радуйся, яко "Господь благоволит в людех своих".
Радуйся, яко Господь волю боящихся Его сотворит и молитву их услышит и спасет их.
Радуйся, яко восхвалятся преподобнии во славе и возрадуются на ложах своих.
Радуйся, блаженная старице Матроно, предивная чудотворице.
КОНДАК 13
О, блаженная мати, услыши ныне воспеваемое наше тебе хвалебное пение и моление, обещавшая и по смерти слышати вопиющих к тебе и испроси у Спасителя нашего Господа Иисуса Христа грехов наших прощения, христианския кончины жизни нашея и доброго ответа на страшном судище Его, да и мы со всеми помилованными Богом сподобимся в селениих райских славити Святую Троицу красным пением:
Аллилуия.
(Сей КОНДАК читаем трижды и по сем читаем ИКОС 1 и КОНДАК 1 )
МОЛИТВА 1
О блаженная мати Матроно, душею на небеси пред Престолом Божиим предстоящи, телом же на земли почивающи, и данною ти свыше благодатию различные чудеса источающи. Призри ныне милостивным твоим оком на ны, грешныя, в скорбех, болезнех и греховных искушениих дни своя иждивающия, утеши ны, отчаянныя, исцели недуги наши лютыя, от Бога нам по грехом нашим попущаемыя, избави нас от многих бед и обстояний, умоли Господа нашего Иисуса Христа простити нам все наши согрешения, беззакония и грехопадения, имиже мы от юности нашея даже до настоящаго дне и часа согрешихом, да твоими молитвами получивше благодать и велию милость, прославим в Троице Единого Бога, Отца, и Сына, и Святаго Духа, ныне и присно и во веки веков. Аминь.
Тропарь, глас 2
Богом умудренную блаженную старицу Матрону, земли Тульския процветение и града Москвы преславное украшение, восхвалим днесь, вернии. Сия бо, света дневнаго не познавши, светом Христовым просветися и даром прозрения и исцеления обогатися. Пресельница же и странница на земли бывши, ныне в чертозех Небесных Престолу Божию предстоит и молится о душах наших.
Кондак, глас 7
К служению Христу от чресл матерня предъизбранная, праведная Матроно, стезе скорбей и печалей шествующи, твердую веру и благочестие явивши, Богу угодила еси. Темже, почитающе память твою, молим тя: помози и нам в любви Божии пребывати, старице блаженная.
Величание
Величаем тя, святая праведная старице Матроно, и чтим святую память твою, ты бо молиши о нас Христа Бога нашего.
________________________________________________
(Никонова Матрона Димитриевна 1881-1952,
день ангела 22 ноября, 19.04/02.05 - день памяти).
19.03/01.04.98 Состоялось обретение мощей
18.04/01.05.98 Мощи Матроны перенесены в
Покровский Собор Покровского женского монастыря
(Москва,Таганская улица)
19.04/02.05.99 Причислена к лику месточтимых
святых Московской епархии